Vi jobber med å utvikle skulen og denne linja vert truleg endra for skuleåret 2013/14
«Finn din personlege stil gjennom leik, utforsking og eksperimentering. Her kan du skape dine bilde på lerret, murvegg eller glansa papir.»
Å skape eit bilde handlar om å uttrykke seg, om å formidle fantasiar og meiningar. Eit år på Bildekunst vil gje deg mogelegheit til dette. Gjennom spennande og varierte oppgåve vil du få praktisk og teoretisk innføring i ulike teknikkar som teikning, maling, foto/mørkerom, grafikk, collage, stensiltrykk og liknande.
Vi flettar inn kunsthistorie der det fell seg naturleg, og vi ser på kunstneriske verkemiddel som farge, form, komposisjon, lys/skygge, linje, rom etc.
Det vi likevel kjem til å fokusere mest på i løpet av året er at du skal tørre å prøve ut ideane dine.
Vi har inga krav om forkunnskap, det viktigaste er at du er nysgjerrig og klar for utfordringar. Dette er linja for deg som ynskjer eit variert år der du kan gjera alt frå å lage store maleri, små grafiske trykk, knipse vilt rundt deg med et fisheyekamera, leike med spraybokser eller lage meiningsytrande trykk på ei t-skjorte.
Skulen har diverse verkstader. Bildekunst held i hovudsak til på kunstsalen, men det er fritt fram å bruke både keramikk og treverkstaden på fritida. To timar på måndagar, og kvar onsdag og torsdag slår vi oss laus i klasserommet vårt, om vi ikkje tar med oss fotoapparat eller teikneutstyr og dreg på utflukter. Voss byr på flotte motiv, og Bergen står sjølvsagt også på besøkslista. 4 gonger i året har vi linjeveke, der vi har undervisning på linja kvar dag. Då arbeider vi gjerne med eit vekeprosjekt som vert avslutta med ei utstilling.
I ei av linjevekene reiser vi på studietur. Kontrastar skaper spenning i kvardagen, og ingenting står vel sterkare i kontrast til bygda Voss enn «The Big Apple, metropolen New York. Vi satsar på ein studietur til storbyen som rommar alt ein måtte ynskja seg av kunstnerisk inspirasjon, og av spennande motiv.
Året vert avslutta med «Ditt prosjekt». Det vil seia at vi har eit felles tema som vi jobbar med, men at kvar og ein kan velje teknikk og uttrykksform. Her kan du fordjupe deg i ein teknikk, eller eit materiale du ynskjer å læra meir om. Alle idear er velkomne, slik set du- og dei andre med deg, preg på linja. «Ditt prosjekt» vert, som alle andre arbeid vi lagar, stilt ut. Vi har utstillingar på skulen, men også i nærmiljøet på Voss.
Skulen har det meste av utstyret som trengs. Det er likevel ynskjeleg at elevar på linja har eige analogt kamera. I dagens digitale samfunn kan ein lett skaffe seg brukte analoge kamera til ein billeg penge. Digitalt kamera og eigen bærbar pc med photoshop er eit stort pluss, men er ikkje nødvendig.
